Podemos-Equo Xixón va pidir a Ana González el cumplimientu del plan, empezando pol correctu usu del asturianu na señalización y la cartelería
El grupu municipal moráu y verde detectó dellos incumplimientos del plan, que ta en marcha dende 2016 y va rematar anguaño ensin que se llograren tolos oxetivos previstos.
“Hai problemes na implantación de midíes n’aspectos como la señalización billingüe, nos cartelos y campañes institucionales, nos anuncios oficiales publicaos nos medios de comunicación y na publicidá d’actividaes de Xixón”, esplicó la vocera. Por ello, Huergo va rogar a Ana González que se curie’l cumplimientu d’estes midíes pa procurar l’usu del asturianu.
Hai conceyalíes y servicios que delles vegaes cumplen coles previsiones del Plan de Normalización y otres non, pero agora qu’el branu terminó “vimos qu’hai actos importantes como l’Hípicu o La Selmana Negra que nun cumplieron y eso ye d’algo que l’Ayuntamientu nun puede permitir, entá mas cuando son actividaes subvencionaes pol propiu conceyu”.
Pa Yolanda Huergo “ye’l momentu de dir dando pasos, de plantegase midíes que vaigan un pasu más allá y pa ello ye imprescindible garantizar el cumplimientu de lo que yá tenemos”
