La vocera de Podemos-Equo Xixón señaló que velar pol cumplimientu de les midíes «va ser l’oxetivu a lo llargo de tol mandatu»
«Gustaríanos que’l Plan de Normalización Lingüistica fuera más ambiciosu que l’anterior porque la sociedá asturiana asina lo demanda«, diz la vocera de Podemos-Equo Xixón, Yolanda Huergo. El grupu municipal va estudiar a fondu’l documentu pa valorar les midíes y, sobremanera, los plazos d’implantación de les mesmes: «Velar pol so cumplimientu va ser ún de los nuesos oxetivos a lo llargo d’esti mandatu».
Y ye que pa la vocera «lo importante ye cumplir les midíes que figuren de forma definitiva nél». Asina, refiriose a les munches midíes que figuraben nel Plan 2016-2019 que nun se llevaron a cabu. «Ye normativa municipal y como tal tien de cumplise. Dalgunes midíes yeren tan esenciales, polo visibles, como les que tienen que ver cola toponimia, onde los incumplimientos foron más qu’evidentes».
